京都紅葉之旅

8-15/11/2003

[第一日] [第二日] [第三日] [第四日] [第五日] [第六日] [第七日] [第八日]

12-11-03 Wed

今朝真係無落雨，一早執好行李就check out， 之後放低d行李0係京都車站0既locker，咁我地就搭巴士去金閣寺0刺。0係京都站搭205號巴士金閣寺道落車，行5分鐘就到lu。嘩，好多人呀，仲有好多係學生，佢地好似去旅行咁，有小學生又有中學生，我地諗住9點前0黎到等開門，點知原來呢個時間先最多人。入到去見到金閣寺，真係好靚呀，可能今日天氣好，成個金閣寺都好"殘"眼， 不過太多人啦，想影張靚相都俾d人阻住晒，要等好耐先被到d人。

跟住搭205巴士去西ノ京円町站落車， 再行去JR円町駅搭車去嵯峨野嵐山駅，一行出去隔離就係嵯峨野觀光火車0既車站喇。嘩，又係勁多人，即刻排隊買飛先，一路排一路睇住個display，下一班車full 0左，再排多陣再下一班車都full埋，得返企位咋，企位都殺啦，如果要坐位要等成三四班車。

買完飛仲有個凌鐘時間，我地就行去附近0既天龍寺喇。呢到真係比其他地方多d紅葉，真係好靚，原來入到裡面仲靚，個寺隔離有個湖，湖裡面仲有鯉魚添，對面山又有好多紅葉，真係成幅畫咁，我覺得咁多間寺最靚係呢間喇。 再行過少少有個竹林，都好大0架，可以再行入去，不過我地好趕，因為趕住返去車站排隊，驚遲0左無位企，所以衝衝影完相就行返去車站，本來想去埋渡月橋，係出名0既名勝之一，不過都係唔夠時間，無去到。

行返去嵯峨野站，已經好多人排緊隊，出到月台，其實買飛個時已經mark好晒邊個車卡，我地就企番0係0個卡0既位置等。架車終於0黎啦，好緊張呀，佢真係好似一架蒸汽火車，第一卡仲係無窗，可以好清楚咁睇晒出面d風景，不過我地坐第二卡就無咁特別lu。開車啦，沿路0既風景都幾靚，不過都係無乜紅葉，有d失望。沿路向下望就見到保津川，不時都會見到一d坐木船沿保津川遊覽0既遊客向我地揮手，而我地車上面0既人見到亦都會回敬，突然間覺得好親切，好開心呀。

觀光火車去到亀岡站為總站，落0左車之後覺得好肚餓，而呢到得一間小舖頭淨係有烏冬賣，咁就0係到食烏冬啦，得兩款揀，我揀0左天婦羅烏冬，當然無個日d手打烏冬咁好食啦。本來我地可以搭返觀光車返轉頭，不過因為我地下一站要去稻荷，所以我地0係亀岡站落車，然後行過隔離0既JR馬堀站搭火車去稻荷站。

下一站就係伏見稻荷大社， 一出稻荷站就見到， 呢到最出名0既就係千本鳥居， 一個個鳥居密密麻麻咁沿住個山排上去，如果要一路行晒，可能要成兩個鐘，所以我地只係行0左一斷仔就返轉頭lu。唔知係唔係因為d鳥居太密，同埋周圍都係樹林，所以呢到好似黑漆漆咁。跟住我地就返去京都車站，0係車站買d京都0既手信，之後0係locker攞番個喼，就搭JR落大阪喇。

我地去到大阪新今宮站落車，已經五點幾，天都黑晒，跟住搵酒店。呢區好似怪怪地咁，靜蠅蠅，周圍都係d中坑阿叔，d人又好似騎騎呢呢，衣著比較平民化，我地推住個喼，d人就好奇怪咁望住晒，有d驚驚地添。一路行都見到好多賓館式0既酒店，地下係大浴場，好多阿叔0係到留連。終於見到我地間酒店啦，我地今次住呢間叫Hotel Escargot，上網搵0既，非常平，每人¥2100一晚，不過就公共浴室同廁所。要講下呢間酒店，我地住三樓，間房對住個廁所，以為咁近好正添，點知個廁所男女共用，其實我地一開房門就見到d尿兜，如果有個阿伯0係到屙尿，一開門就會見到，都幾驚，所以每次開門我地都要"莊"下有無人0係廁所，去廁所又要等無人先敢去。沖涼仲騎呢，個女浴室0係二樓，要行條秘密樓梯落二樓，而條樓梯又露天0架，搭電梯又去唔到二樓喎，好彩我地有伴，可以一齊去，如果得我一個都幾驚。撇開d騎呢0野，其實呢間酒店都好乾淨，起碼自己有間房，有個電視機，唔駛限住息燈時間，浴室都非常乾淨，咁0既價錢其實真係好底。

放低行李就出去食飯喇，呢到好靜，d飯店全部都煙霧迷漫，入面多數都係d男人0係到煲煙飲啤酒，我地行0左好遠先搵到間正常d食定食0既舖頭，就入去食0左個牛肉飯，都幾好食喎。食完衝衝返酒店，因為想早d沖涼，晏0左行0個條樓梯去浴室好驚0架麻。

消費情報:

車站大型locker ¥600

巴士一程  ¥220

金閣寺 ¥400

JR円町駅至嵯峨野嵐山駅 ¥180

嵯峨野觀光火車單程 ¥600

天龍寺 ¥500

JR馬堀站至稻荷站 ¥400

伏見稻荷大社 FREE

JR稻荷站至京都站 ¥140

JR京都站至大阪新今宮站 ¥890

Hotel Escargot三晚 ¥6300

牛肉飯定食 ¥780